AJIMEZ ARTE

Crítica

Antonio Alonso de la Torre García

Too va bien

0 comentarios

David Martínez Suárez (L’Entregu, 1984) estudió Belles Artes en Bilbao. Nesa ciudá trabaya xunto a Txomin Badiola. Puede vese la so obra na Sala Borrón d’Uviéu hasta’l 25 de xunu.

La xente muévese tolos díes per un mundu que namás ye que puru cuentu, andamos arrodiaos d’una continua interpretación. Esti papelón ye una duplicidá asemeyada a la que pue observase en Too va bien, la película de Godard na que participen personaxes comprometíos cola so militancia clandestina mientres sostienen a un tiempu una finxida posición social. Trátase d’un tracamundiu qu’amiesta autenticidá y bambolla, un baturiciu nel que se tresfiguren los planos de la  realidá. Ye asina como queda n’evidencia una sociedá na cual la rellación ente’l “yo” y el “nosotros” ta frayada. La más de les veces esto fai que los homes nos movamos nun simulacru opresivu que nun nos lleva a nengún llau.

La colectividá fórmase con un enguedeyu d’individuos n’interdependencia a los que-yos falten fluxos de comunicación. Esta ausencia de referencies desespéralos, por eso faen por fuxir d’unes redes cada día meyor organizaes. Unes redes qu’atropen nun sólo lo económico, tamién lo cultural o lo educativo. Tal paez qu’hubiera una puxante maquinaria destinada a la esclusión.

Esto ye lo qu’espeya la obra de David, que rechaza la xerarquía, destruye les atadures, y amuesa a unos individuos enllenos d’ansiedá y desestructuraos. Trátase d’una individualidá ensin norte que nun sabe si la realidá ye lo que ye o ye otra cosa. Los güeyos del espectador piérdense ente unes imáxenes ambigües. Delles veces paez que reconocemos eses cares enllenes de reflexos y qu’intercambien óptiques tan dixebraes. Los contornos de los cuerpos son difíciles de llendar, porque tán rotos o porque tienen rellumos que cieguen. El ser humanu yá nun ye un sistema zarráu, escacha y pierde la so unidá. Les rellaciones ente’l mundu interior y esterior modifíquense al volvese mudable la noción d’identidá. Los bordes que construyen al individuu son atacaos y con ello amenázase l’orde social y cuestiónase la colectividá.

Pero tampoco sedría nada prestosa una sociedá na que toos fueren iguales, que nun fuera pueblu sinón masa, dalgo asemeyao a un rebañu. Ente otres coses porque los rebaños son fácilmente manexables y piden pastores que los guíen. ¿Ónde ta entós l’equilibriu?

Ante tanto enguedeyu y dixebra xurden duldes sobre cómo algamar una organización. La respuesta pue tar en que ye la discontinuidá la que fai ver el verdaderu sentíu. Pa toles coses de la vida les perspeutives son variaes, por exemplu según quien visite esta esposición, según quien escriba d’ella o según la llingua en que se faiga. Cada cadarma cerebral ye única y tien la necesidá de configurase a la so escala dientro d’un procesu universal. Un recorriu reflesivu pela sala debe ser el primer pasu pa una tresformación interior. Y esi ye un camín personal, que debiera tar llibre d’inflluencies esternes. Caún que ponga en rellación lo visto colo que-y pete, según les sos vivencies. Namás asina fadrá de la so esperiencia única un planu más de la realidá que vivimos.


 

Volver

Comentarios

No hay comentarios a esta critica

Si lo deseas, puedes enviar un comentario a critica:

Envía esta referencia