AJIMEZ ARTE

Crítica

Imagen

Ánxel Nava

El símbolo de un atentado cultural

0 comentarios

Una llamada a la movilización para exigir la reposición de la obra de Alba


Publicado en La Nueva España
 

 La desventurada pieza de Fernando Alba apaez y desapaez del panorama visual de la ciudá d'Uviéu como'l monstruu del llagu Ness. Ritmos o tiempos políticos d'una situación vergoñosa qu'ufiende a la razón y la cultura. Ente ríos de tinta y polémiques urbanes van les chaplones de fierro al debalu, del Llagu Enol al parque móvil, al mataderu municipal, pa Pontón de Vaqueros, onde asomaron embaxo los contenedores de basoria faciéndo-yos compaña a los fierros d'Eiffel, otra pieza marxinada. Agora reapaecen en Los Catalanes, salen otra vegada a la superficie pa recordanos en fiestes mateínes que la cultura tien poco que celebrar. 

Fernando Alba foi profesor d'escultura de la Escuela d'Arte d'Uviéu -enantes Artes y Oficios- y formó xeneraciones d'artistes, ente les que me cuento. A la puerta la Escuela tenía de llantase una serie gráfica d'esti procesu kafkianu, con un lletreru a la manera de la Puerta l'Infiernu del Dante: «Vosotros, los qu'entrais equí pa ser artistes, perdéi toa esperanza: Asina ye como se trata una obra d'arte nesta ciudá». Una llición a nun escaecer pa la vida. 

Ye vox pópuli cómo se ponen y quiten escultures n'Uviéu. Detrás d'esta persecución de la que ye víctima la escultura d'Alba ta la eliminación de formes estétiques que nun son del caprichu del alcalde, el que dalguién nomatara Médicis llocal. Falar nesta ciudá de conceutos d'arte contemporáneu ye como falar chinu, llingua que va deprendese enantes que la propia. Ye ablucante la desconocencia de llinguaxes del arte actual, como si nun esistiera la especialidá d'Hestoria del Arte na Universidá. La desapaición de sales d'arte municipales o la falta asesores d'arte nel Ayuntamientu d'una ciudá que presume de culta. ¿Y con eses cartes de presentación queríen ser «Ciudá europea de la cultura»?... Muncho tien que meyorar la sensibilidá artística del conceyu. 

Con un alcalde bifronte pa les artes, tan bon decorador de zarzuela como iconoclasta pal arte actual, dixébrase mal el llugar del arte nel espaciu urbano. Nun ye una anéudota nel asfaltu pa sacase fotos. Estrémase una escultura d'un «chirimbolu», un fitu de circulación pa los coches o un boladru pa los aparcamientos. La escultura en fierro del sieglu XX trabayó con astraiciones, planos y xeometríes. En fierro ferruñoso pa xugar col lluz. Llean les teoríes de la desocupación del cubu d'Oteiza, mayestru de la escultura vasca. Calletren por qué-y daríen el premiu «Príncipe» de les Artes a Richard Serra, o por qué tará una obra suya ferruñando nel Guggenheim de Bilbao. Y atalanten por qué a esos grandes escultores ye comparatible la obra d'Alba, o por qué tien llugar principal na hestoria del arte contemporáneu d'Asturies. 

El señor alcalde de barriu de La Corredoria fai unes glorioses declaraciones echando-y la culpa al autor y al grupu políticu que desatapara'l casu, por nun querer acomodase a una islleta na carretera. La propuesta de la retonda desplícase sola. Vean el modelu, tamién en La Corredoria: nuna retonda, medio entarráes ensin accesu nin función, dexaron dos pieces hestóriques inventariaes d'arte urbano: la fuente de los Cuatro Caños de Manuel Reguera, gran arquiteutu del XVIII, y el llavaderu en formigón de Sánchez del Río, que con El Paragües d'Uviéu ye exemplu de l'arquiteutura funcionalista-espresionista del XX. Tarán encantaos de la solución. 

Topárenles por fin, nun fizo falta l'inspeutor Colombo, nin les tragó la tierra. Namás taben escondíes pa que nun les viera la xente. ¿Y pa cuándo la reposición? De primeres, naide del gobiernu municipal faló col escultor pa pidi-y mil perdones y tratar un arreglu, si lu tien. Y qué facer. ¿Otra copia? ¿Otru encargu?... Primero habrá qu'entrugá-ylo al autor, qué ámbetu necesita y ónde llantar la dichosa pieza, orixinal o refecha. ¿Otru espaciu na periferia?... Nun ye la solución arrequexala pa una reserva, con perdón de los vecinos de La Corredoria, que tienen drechu al meyor arte público. Ye que la obra ye agora un iconu cultural que tien de tornar un día con tolos honores a un espaciu señalao de la ciudá. 

La pieza de Fernando Alba tresciende la so realidá física pa conseñase símbolu del mayor atentáu a la cultura que se ficiera con impunidá dende una institución pública. Un crime nel que reinciden los que lo ficieron y son cómplices los que lo aplauden. Esi atropellu tien una responsabilidá. Del rexidor Gabino de Lorenzo, que mandó quitala esfaciéndola a soplete, y dafechu ye culpable del so abandonu, perda o destruición. Y del Ayuntamientu d'Uviéu, que penriba la propiedá ye responsable de la so guarda, al ser una escultura urbana asitiada nel espaciu público. 

La Conseyería de Cultura y el conseyeru Marcos Vallaure, ex direutor del Muséu de Belles Artes d'Asturies, tienen que salir na so defensa, anque esto-y suponga otra batalla más. El Serviciu de Patrimoniu dalgo podía dicir. Pero la causa tien que treslladase fuera. Mandar informe a la UNESCO por entemedies d'ICOMOS, a ver cómo ye qu'una obra d'arte urbano acabe ente roña na basoria o arramplen con ella pa chatarra. O dir a los tribunales de xusticia, que si la denuncia nun la fai l'autor por prudencia o paciencia franciscana, debía facela la oposición municipal, o una plataforma ciudadana por aniciativa popular. 

Indígname esti desafueru, y denunciélo a costa la mio propia obra cuando en Diáspora neguéme a instalar una pieza n'Uviéu mentantu la del mayestru toviere proscrita. Dixe daquella: «Nun hai dignidá nes artes d'Asturies mientres la obra d'Alba nun torne a esta ciudá». 

Poro dende la sociedá civil tenemos de llevantar la voz. Como miembru activu de SOS Cultura camiento qu'un movimientu ciudadanu tendría que facer de la obra d'Alba bandera d'un cambiu cultural de la ciudá. Y pidir collaboración a la Facultá d'Hestoria del Arte de la Universidá d'Uviéu, a la Escuela d'Arte, a l'Asociación de les Artes Visuales d'Asturies y a cuantes persones cultes o asociaciones culturales se solidaricen con esta causa, que nun ye namás la del escultor Fernando Alba, nin la de nengún partíu políticu, sinón la de la dignidá de les artes

Volver

Comentarios

No hay comentarios a esta critica

Si lo deseas, puedes enviar un comentario a critica:

Envía esta referencia